文／蹲點實作生｜許栗崧 Leo
本文章使用臺語漢字書寫。（鹿港腔）／Pún bûn-tsiong sír-iōng Tâi-gír hàn-jī sir-siá. (Lo̍k-káng-khiunn)
地方的向望
徛佇鹿仔港這个古城，少年家心向地方，敢抑閣敢轉來到心愛的故鄉？
今年(2026)的5月30號佮31號，鹿港囝仔團隊舉辦今年第一場「台味好感少年家CLUB」的活動，阮邀請著全臺灣佮家鄉有情感的少年家做伙來到鹿港，來發現這个古城的文化。課程當中，阮行踏鹿仔港各個巷仔口，走揣 (tsáu-tshěr) 路裡逐項有價值的人事物，發現真濟留佇家鄉拍拚的鄉親，佮誠濟對外鄉閣反倒轉來故鄉的鹿港囡仔。
佇互相自我紹介、了解各位學員了後，逐家先聽講師對鹿港囝仔這个計畫的簡單紹介，才來繼續紲落來的課程。
/
我的紀錄佮心得分享
▎鹿仔港對少年家來講，是一个啥物款的所在？
洛津有夢
初初看著「洛津有夢」的kha̋ng-páng，干焦知影伊是一間倚靠修復了後的老厝來做咖啡店生理的新創店家，一直到參加這个實作計劃才對伊有較深的了解。
身為一个在地人，過去定定看著家鄉的老厝漸漸消失，親像百川病院、金銀廳、亞洲大戲院等等，這个過程是一个歷史城市足悽慘的所在，所以會當看到一寡猶閣有留落來的老厝保留原貌，改做新的店頭，重新再利用，是一件非常感動的代誌。
蘭馨齋
中山路（五福大街）路邊亭仔跤內，蘭馨齋店頭家是一位書法家。傳承厝內毛筆字事業了後，伊除了繼續傳統書法，嘛想欲創新，毋但共作品佮其他在地店頭合作推出文化商品，閣用客製化的商品來增加店面的附加價值，親像這改課程當中逐家製作的毛筆字葵扇就是一項。
參先生工作室
來自福興鄉的參先生工作室頭家娘專門咧做se-bí-looh、siat-tsuh佮新娘衫，伊用回收再生布料，經過再利用了後，變做誠濟媠氣的設計。出身海口的伊，用輾轉的鹿港海口腔臺語解說講伊是按怎共逐年辦佇福鹿溪的國際龍船比賽的廣告帆布，經過鉸裁佮修剪，做出其他閣較有價值的布料設計
佇這改的課程內底（lāi-teré），阮的學員利用頭家娘紮的花布來製作專門予家己的細箍kha-báng，出外走跳的時嘛會用共當做一个揹佇身軀頂的「通懷仔」，方便閣古錐。遮的花布攏是頭家娘四界揣來的老布矣，差不多 (tsha̋u) 是咱阿公阿媽彼个時陣留落來的。
正爿這个紅的kha-báng是我佇課程內製作的，彼陣我看著紅布佮一隻虎，著感覺講這兩項足四配的，真有鹿港民俗節慶的氣味佇咧，所以就直接提來做咯。
真濟老店佇現代化的潮流之下，做出改變，只是想欲將家己的文化對世人分享，無想欲予時代的大手拍倒。若是以我來看，鹿仔港是實實在在的一間「露天博物館」。歷史人文佇遮匯集，因為人的關係來濫做伙，產生誠濟心適的故事。
這改以觀眾的身分踏入地方，深入鹿港古城，窺探伊神秘又閣活骨的所在，實在予我真濟感動的所在。
少年家的向望：按怎轉來？
活動結束了後，我家己行佇鹿港街仔路裡，看著中山路規排的鼓仔燈佮歷史古厝，那行那想：遮的老建築景致愛如何來延續落去？除了改作現代店頭，敢有會當回復依當初樣貌佮功能的方式？
這著看咱佮後一代按怎來打拚矣。
/
Lukang Future Center｜Local incubator
