文／蹲點實作生｜許栗崧 Leo
本文章使用臺語漢字書寫。（鹿港腔）／Pún bûn-tsiong sír-iōng Tâi-gír hàn-jī sir-siá. (Lo̍k-káng-khiunn)
七月二十六號，鹿港囝仔用「少年家豎起．地方所在，選老厝敢好？」為主題，舉辦臺味好感少年家的走讀活動。下早時（e-tsái-sî），阮逐家佇禾火食堂集合，綴佇咧『鹿港學哥』李宗學（Lí Tsong-ha̍k）老師的後壁，作伙行入去鹿仔港的巷仔內，那聽宗學講古，那佇巷仔口感受鹿港的歷史（li̍k-sír）風華。
阮先行到景福巷（Kíng-hok-hāng）內面，佇恆生堂（Hîng-sing-tông）三合院門跤口聽宗學咧紹介：雖然這間舊厝看起來誠氣派，猶毋過伊並無予人登錄作歷史建築抑是古蹟。雖然進前有人共翻新、修復，但是規間厝的裝潢佮模樣攏無走鐘去，會使講是真稀罕。
有當時仔，老厝無應該予人號做「老厝」，伊干焦是舊矣爾爾。
煞落來，阮繼續行對景福巷閣較深的所在入去，到黃家「紫雲衍派」（Tsí-hûn Ián-phài）厝宅面頭前翕相，這間舊厝進前捌險仔予人放臭生荒去，後來有人出錢、出力，才共這間鹿港第一大姓的祖厝修復予好，看起來真氣派。
景福巷的盡頭是古早予人叫做「橫街」（huînn-kue）的民族路，邊仔壁頂就是阮五个實作生上熟識的所在——勝豐酒吧的 kha̋ng-páng（かんばん，招牌仔）。我感覺規條景福巷予人一个誠恬靜的感受，比起別條中山大路，抑是親像埔頭街（Poo-thâu-kue）、瑤林街（Iâu-lîm-kue）這款會有足濟觀光客咧搢人縫（tsìnn lâng phāng）的巷仔路，予我閣較有家己的空間會當好好仔感受古鎮的風華。
行過九曲巷（Kiú-khiok-hāng）了後，阮轉去到洛津有夢咖啡館內，斟酌來聽這馬長源病院（Tiông-guân Pǐnn-ǐnn）委託管理的館長，來紹介這間會使代表鹿仔港醫療佮攝影（liap-iánn）歷史的重要建築，了後再規陣人入去參訪。窮實，我較早就捌聽厝內序大咧講，古早時的鹿港就是許讀（Khóo Tho̍k）醫生創立的長源上有名，伊後生（hǎu-sinn）許蒼澤（Khóo Tshong-ti̍k）是鹿港有名的攝影家，在生的時定定有閒就 kha-mé-lah（カメラ，翕相機）揹咧，佇市內一直翕到下昏暗（ing-àm）才肯收煞來轉，致使伊有留落來不止仔濟的鹿港珍貴歷史影像紀錄，實在真佩服。
舊的物件，敢一定是䆀的？
佇這改活動結束了後，我想起阮家己厝內嘛是一間五十冬以上的老厝矣，雖然外表看起來無啥整齊，猶毋過這是我自細漢就有強烈情感的所在；反倒來看鹿港市內的巷仔路，一寡老厝、舊路看起來小寡仔破破，無啥好看，我感覺這只是角度問題，你若是踮遮蹛十年、五十年，絕對袂有這款的感覺。磚仔壁的紅，是一款都市內底無法度揣著的紅；厝蓋頂烏白湠的草，有一種別的所在袂當看著的青。
鹿仔港，敢若有足濟巷仔口，會當予咱來佮歷史美感來相見。
——— 鹿仔港，媠甲！
